حج پروازوں کا آغاز 24 جولائی سے ہوگا ،عازمین کو فراڈ سے بچانے کیلئے ایس ایم ایس کا آغاز
اسلام آباد(صباح نیوز) حج پروازوں کا آغاز 24 جولائی سے ہوگا جو آئندہ ماہ کی 26 تاریخ تک جاری رہیگا۔ وزارت مذہبی امور کے مطابق پہلی حج پرواز اسلام آباد سے مدینہ منورہ جائیگی۔ عازمین حج اپنی پروازوں کا شیڈول وزارت کی ویب سائٹ حج انفو ڈاٹ او آر جی پر دیکھ سکتے ہیں۔دریں اثنا وزارت مذہبی امور نے عازمین حج کو فراڈ سے بچانے کیلئے ایس ایم ایس سروس کا آغاز کردیا جبکہ نجی ٹور آپریٹر کمپنی کا کوٹہ اور اہلیت چیک کرنے کی بھی ہدایت کردی گئی ہے۔ وزارت مذہبی امور نے عازمین کو ہدایت کی ہے کہ وہ بکنگ سے پہلے ٹور آپریٹرز کمپنی کے کوٹہ اور اہلیت کو چیک کریں جس سے متعلق معلومات کیلئے کمپنی کے لائسنس نمبر کے پہلے 4 ہندسے 8331پر میسج کئے جائیں۔وزارت مذہبی امور کے ترجمان نے اس بات پر بھی زور دیا ہے کہ عازمین جعلساز کمپنیوں کے دھوکے اور سب ایجنٹس کو بھاری کمیشن دینے سے بچیں اور بکنگ کرواتے وقت کمپنی کی مہر شدہ اصل رسید اور معاہدے کی کاپی ضرورطلب کریں۔
