لاہور (سپورٹس رپورٹر+نمائندہ سپورٹس) 19ویں ایشین سینئر والی بال چیمپیئن شپ 2017ءمیں پاکستان نے ہانگ کانگ کو تین دو سے ہرا دیا۔ انڈونیشیا میں جاری چیمپیئن شپ میں گذشتہ روز پاکستان اور ہانگ کانگ کی ٹیموں کے درمیان میچ کھیلا گیا۔ اس میچ میں پہلے دو سیٹ ہانگ کانگ ٹیم نے 25-21 اور 25-22 سے اپنے نام کیے تو تیسرے، چوتھے اور پانچویں سیٹ میں پاکستان ٹیم کے کھلاڑیوں نے شاندار کھیل پیش کرتے ہوئے 25-20، 25-21 اور 15-9 سے کامیابی حاصل کر کے میچ جیت لیا۔ گذشتہ روز کھیلے جانے والے میچ میں پاکستان کے اہم کھلاڑی ایمل خان بیماری کے باعث نہیں کھیل سکے تھے۔ پاکستان اپنا اگلا میچ ہفتہ کو کھیلے گی۔ پاکستان نے پہلے میچ میں عراق کے خلا ف تین ایک سے کامیابی حاصل کی تھی ۔