بہاولپور (نامہ نگار ) بہاولپور کی تحصیل اوچ شریف میں 70 سالہ بوڑھے نے 13 سالہ لڑکی سے نکاح کرلیا،پولیس نے دلہا،دلہن کے والد اور نکاح خواں سمیت 6افراد کو گرفتار کرکے مقدمہ درج کرلیا ۔پولیس کے مطابق اوچ شریف کے نواحی علاقے موضع بدھو والی میں 20 ایکڑ زرعی زمین کے مالک 77 سالہ سراج نے والد کو زمین کا لالچ دیکر اسکی 13 سالہ لڑکی سلمیٰ بی بی سے نکاح کر لیا لیکن رخصتی میں چند گھنٹے تھے کہ بوڑھے دلہا میاں کے نواسے، نواسیوں نے پولیس کو اطلاع کر دی ۔پولیس نے دلہا،دلہن کے والد اور نکاح خواں سمیت 6افراد کو گرفتار کرکے مقدمہ درج کرلیا، ملزمان کو قانونی کارروائی کیلئے احمد پور شرقیہ میں علاقہ مجسٹریٹ کی عدالت میں پیش کیا جائے گا ۔معلوم ہوا ہے کہ سلمیٰ بی بی کی عمر 13 سال ہے جبکہ نکاح نامے میں 16 سال لکھوائی گئی تھی جبکہ دولہا کی عمر 71 سال ہے۔ پولیس نے نکاح نامہ بھی قبضے میں لے لیا اور مقدمے میں جعلسازی کی دفعات شامل ہیں اور دلہن کا والد بھی گرفتار ہے۔