لاہور(سپورٹس رپورٹر) پانچویں قومی انڈر 18 ویمن ہاکی چیمپیئن شپ میں مزید دو میچوں کا فیصلہ ہو گیا۔ پنجاب کلر اور پاکستان بورڈ کی ٹیموں نے اپنے اپنے میچز جیت لیے۔نیشنل ہاکی سٹیڈیم لاہور میں جاری چیمپیئن شپ میں گذشتہ روز پہلا میچ پنجاب کلر اور بلوچستان کی ٹیموں کے درمیان کھیلا گیا جس میں پنجاب کلر نے یکطرفہ مقابلے میں بلوچستان ٹیم کو صفر کے مقابلے 21 گول سے ہرا دیا۔ فاتح ٹیم کی فاروڈ کھلاڑی حمیرا لطیف نے 8 گول سکور کیے۔ تبارکہ طارق نے تین جبکہ آرزو منصور، اقرا حنیف، عطیہ انیس، اریبہ سرور اور مہوش سردار نے دو دو گول سکور کیے۔ پنجاب اور بلوچستان کی ٹیموں کے درمیان یکطرفہ مقابلہ دیکھنے کو ملا جس کے بعد پاکستان بورڈ اور سندھ کی ٹیموں کے درمیان دلچسپ مقابلہ دیکھنے کو ملا جس میں پاکستان بورڈ کی ٹیم نے دو کے مقابلے تین گول سے کامیابی اپنے نام کی۔ فاتح ٹیم کی جانب سے رخسار اسلم، عرفانہ اسلم اور سیمہ صبور نے ایک ایک جبکہ سندھ وائٹس کی جانب سے دونوں گول تہمینہ پروین نے کیے۔ چیمپئن شپ میں آج منگل کو چار میچ کھیلے جائیں گے جس میں آٹھ ٹیمیں ایکشن میں دکھائی دینگی۔