کراچی (نوائے وقت رپورٹ) امیر جماعت اسلامی کراچی حافظ نعیم الرحمان نے کہا ہے کہ ہماری دو سیٹیں آ گئیں‘ سات کا انتظار ہے۔ ہماری بات ثابت ہو گئی کہ ہم جائز بات کر رہے ہیں۔ نجی ٹی وی سے گفتگو کرتے انہوں نے کہا کہ آر اوز سے نتائج جاری کروا دیں ہم بات چیت شروع کر دیں گے۔ پی ٹی آئی کی صورت میں بھی ہمارے پاس ایک بہترین آپشن موجود ہے۔ میئر تو جماعت اسلامی ہی بنائے گی، ہم کراچی میں اس وقت نمبر ون پارٹی ہیں۔ الیکشن کمشن کی جانب سے دو یوسیز کے نتائج میں درستی کے بعد جماعت اسلامی کی نشستیں 88 ہوگئیں۔ پیپلز پارٹی کراچی میں 91 نشستوں کے ساتھ بدستور پہلے نمبر پر، تحریک انصاف 40 نشستوں کے ساتھ تیسرے نمبر پر ہے۔ جانچ پڑتال میں ایک یوسی پیپلز پارٹی اور ایک تحریک انصاف کی کم ہوئی ہے۔ ن لیگ کی7، جمعیت علمائے اسلام (جے یو آئی) کی 3 اور تحریک لبیک پاکستان (ٹی ایل پی) کی 2 نشستیں ہیں۔ مہاجر قومی موومنٹ نے ایک نشست جیتی ہے۔
حافظ نعیم