اسلام آباد (نمائندہ خصوصی +نوائے وقت رپورٹ+ این این آئی) وزیر خارجہ بلاول بھٹو زرداری نے سعودی ہم منصب سے ٹیلی فونک رابطہ کیا۔ سفارتی ذرائع کے مطابق پاک سعودی تعلقات کو مستحکم کرنے پر بات چیت کی گئی۔ باہمی تعاون کے فروغ کیلئے نئی جہتوں کی تلاش پر تبادلہ خیال کیا گیا۔ وزیر خازنہ نے سعودی عرب اور ایران کے سفارتی تعلقات کے قیام کے فیصلے کا خیر مقدم کیا۔ تعلقات بحالی کی صورت میں خطے  پر مثبت اثرات بھی زیر بحث آئے۔ جبکہ  بلاول بھٹو زرداری نے پاکستان سمیت دنیا بھر میں جشنِ نوروز منانے والوں کو مبارک باد دی ہے۔ بیان کے مطابق اپنے پیغام میں  بھٹو زرداری نے پاکستان کی پارسی برادری کو بھی خصوصی طور نوروز کی مبارک باد پیش کی اور ان کے لیے نیک خواہشات کا اظہار کیا ہے۔ انہوں نے کہا کہ پاکستان کی پارسی کمیونٹی کی ارضِ وطن کے لیے خدمات قوم کے لیے باعث فخر ہیں۔