شریف خاندان کے خلاف ریفرنسز: نیب ٹیم آج آپریشن ڈویژن کو رپورٹ پیش کرے گی
اسلام آباد (نوخیز ساہی‘ دی نیشن رپورٹ) نیب کی مشترکہ تفتیشی ٹیم آج شریف خاندان اور اسحاق ڈار کے خلاف 4 ریفرنسز کے حوالے سے بیورو کے آپریشن ڈویژن کو رپورٹ پیش کرے گی۔ ذرائع کے مطابق راولپنڈی اور لاہور کی تفتیشی ٹیموں نے اپنی حتمی رپورٹیں نیب ہیڈ کوارٹر کو بھیج دی ہیں اور نیب ہیڈکوارٹر معائنے کیلئے رپورٹوں کو پراسیکیوشن ونگ کو بھیجے گا۔ پراسیکیوشن اور آپریشن ونگ سے مشاورت کے بعد نیب ایگزیکٹو بورڈ ریفرنسز فائل کرنے کیلئے منظوری دے گا۔ مشترکہ تفتیشی ٹیم کے ارکان راولپنڈی اور اسلام آباد کی احتساب عدالتوں میں ریفرنسز فائل کرنے تک اسلام آباد میں قیام کریں گے۔ نیب انویسٹی گیشن ٹیم کی عید کی چھٹیاں منسوخ کردی گئی ہیں۔
