کوئٹہ (آئی این پی + نوائے وقت رپورٹ) انسداد دہشت گردی فورس کے 10 ویں بیج کی پاسنگ آئوٹ پریڈ ہوئی۔ وزیر داخلہ بلوچستان سرفراز بگٹی تقریب کے مہمان خصوصی تھے۔ صوبے میں قیام امن کیلئے مسلسل کوششوں پر وزیرداخلہ نے پاک فوج کا شکریہ ادا کیا۔ کانسٹیبل عبدالہادی کو بہترین کارکردگی پر وزیراعلیٰ بلوچستان میڈل سے نوازا گیا۔ (آئی ایس پی آر) کے مطابق پیر کو پاک فوج کے زیراہتمام بلوچستان پولیس کے دس ویں بیج نے تربیت مکمل کر لی۔ پاسنگ آئوٹ پریڈ انسداد دہشت گردی کمپلیکس کوئٹہ گیریژن میں ہوئی جس میں بلوچستان کے وزیرداخلہ سرفراز بگٹی نے شرکت کی۔ بلوچستان کانسٹیبلری‘ لیویز اور پولیس کے 200 اہلکار پاس آئوٹ ہوئے۔ اس موقع پر میجر جنرل ندیم ذکی منج نے کہا کہ پاس آئوٹ ہونے والے تندہی سے کام کریں۔ سکیورٹی اہلکار دوران ڈیوٹی چوکنارہیں۔