لاہور (سپورٹس رپورٹر) باکسنگ میں نوجوان کھلاڑی ملک کا نام روشن کرنے کی کوشش میں لگے ہوئے ہیں۔ لاہور کے باغ جناح کے سرکاری مکان میں رہنے والے نوجوان باکسر محمد طارق سے ملاقات ہو ئی ۔ ان کا کہنا تھا کہ پاکستان میں ہر کھیل کا ٹیلنٹ موجود ہے ضرورت اس امر کی ہے کہ ہم اپنے نوجوان کھلاڑیوں کو کھیل کے مواقع بھی فراہم کریں۔ پاکستان باکسنگ فیڈریشن کے نئے صدر خالد محمود سے بہت ساری توقعات وابستہ ہے کہ وہ اس کھیل کو اوپر لے کر جائیں گے ۔ باکسنگ کا شوق محمد علی کلے کو دیکھ کر ہوا۔ اگر مجھے بین الاقوامی معیار کی تربیت کا موقع فراہم کیا جائے تو قوم کو مایوس نہیں کرونگا۔ پاکستان کے پہلے پروفیشنل باکسر محمد وسیم کی طرح میں بھی پاکستان کا نام پروفیشنل باکسنگ میں روشن کرنا چاہتا ہوں۔ مجھے اس کھیل میں گھر والوں کی مکمل سپورٹ حاصل ہے۔ خاص طور پر میرے والد مبارک علی جنہوں نے ہمیشہ مقابلے کے موقع پر میری حوصلہ افزائی کی۔ لاہور اچھرہ میں واقع عابد باکسنگ کلب میں تربیت حاصل کرتا ہوں جہاں پر میرے استاد عابد رفیق باکسر مجھ پر بڑی محنت کر رہے ہیں۔ انشااﷲ اپنی محنت سے ان کی توقعات پر پورا اترنے کی کوشش کرونگا۔ رواں سال اکتوبر میں آل پاکستان باکسنگ چیمپیئن شپ کو ہدف بنا کر تیاری کر رہا ہوں۔ بہترین باکسر کا اعزاز حاصل کرنے کی کوشش کرونگا۔ اہداف میں قومی کےساتھ ساتھ بین الاقوامی مقابلوں میں ملک کا نام روشن کرنا ہے۔ روزانہ چھ گھنٹے پریکٹس کو دیتا ہوں‘گورنمنٹ کالج یونیورسٹی لاہور کا طالب علم ہوں‘ باکسنگ کی بنیاد پر داخلہ ہوا تھا۔ تعلق غریب گھرانے سے ہے ‘ والدین کی توقعات پر پورا اترنا چاہتا ہوں۔ حکومت کو چاہیے کہ وہ کھیلوں کے فروغ میں کردار ادا کرئے۔پنجاب میں صوبائی حکومت کھیلوں کے فروغ کے لیے اچھے اقدامات اٹھا رہی ہے تاہم اس کے ساتھ ساتھ بین الاقوامی معیار کا انفراسٹرکچر بھی بنایا جائے تاکہ کھلاڑیوں کو اچھی اور بین الاقوامی معیار کی تربیت حاصل کرنے کے لیے بیرون ملک نہ جانا پڑے۔ نوجوان باکسر محمد طارق کا کہنا تھا کہ 2013ءمیں باکسنگ کا آغاز کیا تھا چار سالوں میں قومی سطح کے مقابلوں میں پانچ گولڈ، چار سلور میڈلز کے ساتھ بے شمار سرٹیفیکٹس حاصل کر چکا ہوں۔ مجھے باکسنگ کا جون کی حد تک شوق ہے اپنے شوق کو پورا کرنے کے لیے محنت جاری رکھوں گا۔ ان کا مزید کہنا تھا کہ پاکستان باکسنگ فیڈریشن کے ساتھ ساتھ پنجاب باکسنگ ایسوسی ایشن کے عہدیدار نئے ٹیلنٹ کی تلاش کے لیے بہت زیادہ کام کر رہے ہیں جو اس کھیل کے روشن مستقبل کے لیے خوش آئند ہے۔