شیخوپورہ، منڈی بہاﺅ الدین، ساہیوال، ڈیرہ غازیخان (نامہ نگاران+ ایجنسیاں) مختلف شہروں میں ٹریفک حادثات میں خاتون سمیت 11افراد جاں بحق جبکہ 7 زخمی ہوگئے۔ شیخوپورہ میں موٹر وے پر کوٹ رنجیت کے قریب ایک کار تیزرفتاری کے باعث ٹائر پھٹنے کے بعد قلابازیاں کھانے کے بعد الٹ گئی جس کے نتیجے میں خاتون سمیت 2 افراد جاں بحق جبکہ 2 زخمی ہوگئے۔ کار سوار فیملی اسلام آباد سے لاہور جا رہی تھی۔ حادثے کا شکار ہونیوالے خاندان کا تعلق ٹیکسلا سے بتایا گیا ہے۔ منڈی بہاﺅ الدین میں 18سالہ اکرم اوراسکا 4سالہ بھتیجا کاشف موٹر سائیکلوںکے تصادم میں جان سے ہاتھ دھو بیٹھے جبکہ دو افراد ارسلان اور غلام شبیر شدید زخمی ہوگئے۔ایک اور حادثے میں 10 سالہ عمران زخموں تاب نہ لاتے ہوئے دم توڑ گیا۔ ساہیوال ملتان روڈ پر فتووالا موڑ کے قریب تیز رفتار آئل ٹینکر کی ٹکر سے موٹر سائیکل سوار ماموں بھانجا کرسٹوفر اور آصف ہلاک ہوگئے۔ دریں اثنا راولپنڈی موٹر وے بلکسر انٹرچینج کے قریب کار حادثے میں اڈیالہ جیل کے ڈپٹی سپرنٹنڈنٹ کاشف چیمہ جاں بحق جبکہ انکا ڈرائیور زخمی ہوگیا۔ دریں اثنا ڈیرہ غازیخان میں تیز رفتار کار سڑک کنارے کھڑی ٹریکٹر ٹرالی میں جا گھسی جس کے نتیجے میں 3 افراد موقع پر جاں بحق اور 3 شدید زخمی ہو گئے۔نعش اور زخمیوں کو ڈی ایچ کیو ہسپتال منتقل کر دیا گیا ہے جہاں زخمیوں کی حالت بھی تشویشناک بتائی جاتی ہے۔