مریدکے + شیخوپورہ + کامونکے + فیروزوالہ (نامہ نگاران +نمائندہ خصوصی) جی ٹی روڈ اور لاہور روڈ ٹریفک حادثات میں میاں بیوی سمیت 8 جاں بحق ہوگئے۔ تیزرفتار موٹر سائیکل نے شہر کے معروف چائے فروش چاچا حنیف جبکہ دو کاروں نے چار موٹر سائیکل سواروں کو کچل کر جہان فانی سے رخصت کر دیا۔ ٹرک نے ٹریکٹر ٹرالی سوار دو افراد کو نہر میں ڈبو دیا۔ بتایا گیا کہ کامونکے کے میاں بیوی رانا خالد اور زمرد بی بی موٹرسائیکل پر مریدکے کی طرف آرہے تھے کہ جی ٹی روڈ ننگل ساہداں کے قریب کم عمر کار ڈارئیور نے انہیں کچل ڈالا جس سے وہ موقع پر ہی دم توڑ گئے۔ تیزرفتار موٹر سائیکل سوار نے شہر کے معروف چائے فروش چاچا حنیف کو محلہ رحمان پورہ سے اپنی چائے کی دکان پر جاتے ہوئے ٹکر مار کر ابدی نیند سلا دیا۔ تیسرے حادثہ کے دوران جی ٹی روڈ بنک الفلاح کے قریب تیزرفتار کار نے موٹر سائیکل سوار نعمان عرف نومی کو قریبی دوست سمیت موت کی نیند سلا دیا۔ ننگل ساہداں سٹاپ پر تیز رفتار کار نے موٹرسائیکل رکشہ اور موٹر سائیکل کو ٹکر مار دی جس کے نتیجے میں تین افراد زخمی ہو گئے۔ علاوہ ازیں تھانہ ہائوسنگ کالونی کے علاقہ خان پور نہر کے قریب ٹرالی ڈرائیور نزاکت اور ہیلپر جو کہ کامونکی کے رہائشی ہیں توڑی سے لدی ٹرالی لیکر مقامی فیکٹری کو سپلائی کرنے کیلئے لے جارہے تھے کہ تیز رفتاری کے باعث ٹرک نے بے قابو ہو کر ٹرالی کو اس وقت ٹکر مار دی جب ٹرالی نہر کے پل سے گزر رہی تھی ٹکر اس قدر شدید تھی کہ ٹرالی کے ڈرائیور اور ہیلپر کو سنبھلنے کا موقع تک نہ ملا دونوں ٹرالی سمیت نہر میں جاگرے، ریسکیو ٹیموں نے موقع پر پہنچ کر ڈوبنے والے ٹرالی ڈرائیور اور ہیلپر کی تلاش شروع کردی۔ نزاکت کی نعش مل گئی تاہم دوسری کی تلاش جار ی ہے۔