گوجرانوالہ، نارنگ منڈی: ٹریفک حادثات میں میاں بیوی اور ماں بیٹی جاں بحق
گوجرانوالہ، بدوملہی، نارنگ منڈی، کامونکی (نمائندہ خصوصی+نامہ نگاران) گوجرانوالہ اور نارنگ منڈی میں ٹریفک حادثات میں میاں بیوی اور ماں بیٹی سمیت 4 افراد جاں بحق جبکہ ایک خاتون زخمی ہوگئی۔ گوجرانوالہ میں احمد نگر کے قریب تیزرفتار کار کی ٹکر سے احمد نگیر گنیا والا کے موٹر سائیکل سوار میاں بیوی اسلم اور صحرائوں بی بی جاں بحق ہوگئے۔ دونوں گجرات سے واپس آرہے تھے کہ حادثے کا شکار ہوگئے۔ علاوہ ازیں نارنگ منڈی میں سڑک کنارے پیدل جاتے نواحی گائوں کالی صوبہ خاں کے محمود علی کی بیوی شمیم بی بی اور اسکی بیٹی حفضہ کو تیزرفتار مزدا ٹرک نے کچل ڈالا جس کے نتیجے میں دونوں جان سے ہاتھ دھو بیٹھی جبکہ انکی پڑوسن یاسمین شدید زخمی ہوگئی جسے ہسپتال منتقل کردیا گیا جہاں اسکی حالت نازک بتائی جاتی ہے۔ پولیس نے ضابطہ کی کارروائی کے بعد ماں، بیٹی کی نعشیں ورثا کے حوالے کردیں۔
