کراچی ، بالا کوٹ (مانیٹرنگ نیوز+ این این آئی) مغربی بائی پاس پرکار اورٹرالر میں تصادم سے 5 افراد جاں بحق جبکہ 7 زخمی ہوگئے۔ کوئٹہ میں مغربی بائی پاس پر کار پشین سے کراچی جا رہی تھی کہ تیز رفتاری کے باعث ٹرالرسے ٹکراگئی جس کے نتیجے میں بچے سمیت 5 افراد جاں بحق جبکہ 2 خواتین سمیت 7 افراد زخمی ہوگئے۔ ریسکیو اہلکار فوری طور پر جائے وقوعہ پہنچے اور زخمیوں اور نعشوں کو ہسپتال منتقل کردیا گیا جہاں زخمی 2 خواتین کی حالت تشویشناک ہے۔علاوہ ازیں بالاکوٹ میں کپی گلی کے مقام پر گاڑی دریائے کنہار میں گرنے سے 5 افراد جاں بحق ہوگئے۔ وادی ناران کی سیر کیلئے آئے آزاد کشمیر کے دوستوں کی گاڑی ڈرائیور سے بے قابو ہوکر دریائے کنہار میں گر گئی جس کے نتیجے میں 5 افراد گاڑی سمیت دریا میں ڈوب گئے۔ واقعہ کی اطلاع ملتے ہی ریسکیو کی ٹیمیں، پولیس اور مقامی افراد جائے حادثہ پر پہنچ گئے۔