منڈی صادق گنج : سکول سے گھر جاتے رکشہ نہر میں جا گرا، 3 طالبات سمیت 4 بچے جاں بحق، 8 کو بچا لیا
منڈی صادق گنج، بہاولنگر (نمائندہ نوائے وقت+ نامہ نگار) سکول سے گھر جاتے رکشہ نہر میں جا گرا، 3 طالبات سمیت 4 بچے جاں بحق ہوگئے۔ ایک کی نعش نکال لی گئی، تین طالبات کی تلاش جاری ہے۔ تفصیل کے مطابق سکول میں پڑھنے کیلئے گئے بچے چھٹی کے بعد گھر جا رہے تھے کہ نہر صادقیہ پر گاﺅں بھرے والا کے قریب رکشہ بے قابو ہو کر نہر میں جا گرا جس سے بارہ بچے نہر میں ڈوبنے لگے۔ رکشہ ڈرائیور نے کوشش کر کے آٹھ بچوں کو بچا لیا جبکہ شائستہ، ثنا، افشاں اور ارسلان کو نہ بچا سکا اور چاروں ڈوب گئے۔ کافی تلاش کے بعد ارسلان کی نعش نکال لی گئی جبکہ تین طالبات کی نعشیں ابھی تک نہیں مل سکیں۔ واقعہ سے پورا علاقہ سوگوار ہے۔ علاوہ ازیں عینی شاہدین کے مطابق رکشے میں 12 کے قریب بچے سوار تھے۔ حادثہ تیزرفتاری کے باعث پیش آیا۔ مقامی لوگوں نے اپنی مدد آپ کے تحت 8 بچوں کو بچالیا۔ ریسکیو کے غوطہ خوروں نے موقع پر پہنچ کر مقامی افراد کی مدد سے ڈوبنے والے چاروں بچوں کی تلاش شروع کردی۔
