لاہور(نمائندہ سپورٹس )پاکستان کرکٹ بورڈ نے ثناء میر کو پاکستان کی خواتین کرکٹ ٹیم کی قیادت سے ہٹاتے ہوئے بسمہ معروف کو نئی کپتان مقرر کیا ہے۔ عائشہ اشعر کی جگہ نئی منیجر کا تقرر بھی کیا جا رہا ہے ۔جی ایم کے ساتھ ساتھ محمد الیاس کی سربراہی میں قائم سلیکشن کمیٹی بھی ختم کردی گئی ہے جس کے مزید ارکان عروج ممتاز اور ندیم عباسی تھے۔بسمہ معروف پہلے ہی پاکستان کی خواتین ٹی ٹونٹی ٹیم کی کپتان ہیں۔خواتین ٹیم میں یہ تبدیلیاں ورلڈ کپ میں پاکستانی ٹیم کی مایوس کن کارکردگی کے بعد ناگزیر تھیں۔ہیڈ کوچ کی رپورٹ کے بعد اس بات کے امکانات روشن تھے کہ ثنا میر کیلئے کپتان برقرار رہنا ممکن نہیں رہیگا۔ ہیڈ کوچ صبیح اظہر نے رپورٹ میں کہا تھا کہ ثنا میر اور چند سینئر کھلاڑی مبینہ طور پر اپنی من مانیاں کرتی رہی تھیں اور انہیں منیجر عائشہ اشعر کی حمایت حاصل تھی۔ بورڈ نے نیوزی لینڈ کے مارک کولز کو عبوری طور پر خواتین ٹیم کا کوچ مقرر کیا ہے۔ عائشہ اشعر کو عبوری طور پر ویمنز ونگ کی سربراہ مقرر کیا ہے وہ جنرل منیجر ویمنز کرکٹ کی تقرری تک اس عہدے پر کام کریں گی۔پاکستان کرکٹ بورڈ کا کہنا ہے کہ ثنا میر عام کھلاڑی کی حیثیت سے دستیاب ہونگی تاہم ثنا میر نے قومی کیمپ میں شامل ہونے سے انکار کر رکھا ہے۔