بیجنگ (سپورٹس ڈیسک) پاکستانی کھلاڑی اعصام الحق قریشی نے چینگڈو اوپن ٹینس ٹورنامنٹ مینز ڈبلز ٹائٹل اپنے نام کرلیا ۔گزشتہ روز چین میں کھیلے گئے چینگڈو اوپن کے مینز ڈبلز فائنل میں اعصام الحق اور ان کے اسرائیلی جوڑی دار جوناتھن ایلرچ نے عمدہ کارکردگی کا مظاہرہ کرتے ہوئے برازیل کے مرسیلو ڈیمولائنر اور ان کے نیوزی لینڈ کے جوڑی دار مارکس ڈینل کو دلچسپ مقابلے کے بعد 6-3 اور 7-6 سے ہرا کر ٹائٹل اپنے نام کیا۔ انہوں نے کہا کہ پانچ مختلف پارٹنرز کے ساتھ ٹائٹلز جیتنا یقیناً میرے لئے باعث فخر لمحہ ہے، یہ سال میرے کیلئے کافی شاندار رہا ہے اور اب میری کوشش ہو گی کہ ٹاپ ٹونٹی پوزیشن کے ساتھ سیزن کا اختتام کروں، میں جانتا ہوں کہ میری عمر 37 برس ہو گئی ہے لیکن میں سمجھتا ہوں کہ ابھی مزید چند سالوں تک میری ٹینس باقی ہے، گرینڈ سلام ٹائٹل جیت کر عالمی درجہ بندی میں ٹاپ پوزیشن حاصل کرنا ہدف ہے اور مقصد کے حصول کیلئے میں سخت محنت کروں گا۔