لاہور + فیروز والا (نامہ نگاران) صوبائی دارالحکومت کے مختلف علاقوں میں ڈاکوئوں اور چوروں نے وارداتوں کے دوران متعدد شہریوں سے لاکھوں مالیت کی نقدی، طلائی زیورات، موبائل فون، گاڑیاں، موٹر سائیکلیں اور دیگر سامان لوٹ لیا جبکہ ڈاکوؤں کی فائرنگ سے ایک شہری زخمی ہوگیاہے۔ تفصیلات کے مطابق مانگا منڈی کے علاقہ قلعہ نتھوکے میں ایک گھر میں 8ڈاکو داخل ہوگئے اور لوٹ مار شروع کر دی۔ اس دوران اہل محلہ کو پتا چل گیا اور انہوں نے شور مچا دیا۔ جس پر ڈاکو فائرنگ کرتے ہوئے موقع سے فرار ہونے لگے جبکہ فائرنگ کی زد میں آکر امین نامی شہری زخمی ہوگیا۔ جسے طبی امداد کے لیے مقامی ہسپتال داخل کرا دیا گیا ہے۔ جہاں اس کی حالت خطرے سے باہر بتائی جاتی ہے۔ ڈاکوؤں نے کاہنہ کے رہائشی احسن کے اہلخانہ کو یرغمال بنا کر 7لاکھ مالیت، ڈیفنس بی میں ندیم کی فیملی کو یرغمال بنا کر 4لاکھ 30ہزار مالیت، اچھرہ میں حسن کے گھر سے3لاکھ مالیت، ملت پارک میں فخر کے گھر سے ڈھائی لاکھ مالیت، سمن آباد میں جاوید اور اس کی فیملی سے 2لاکھ20ہزار مالیت کی نقدی، طلائی زیورات، موبائل فون اور دیگر سامان، رائیونڈ میں منیر سے 7لاکھ 80ہزار، گلشن راوی میں عمر سے 5لاکھ 12ہزار، ہربنس پورہ میں قیوم سے 3 لاکھ 51ہزار، شفیق آباد میں امریز سے ایک لاکھ 70ہزار اور موبائل فون، شاہدرہ میں شہزاد سے ایک لاکھ 57ہزار اور موبائل فون، ہربنس پورہ میں فیصل سے موٹرسائیکل، مغلپو رہ میں ظہیر سے 85ہزار اور موبائل فون، ٹبی سٹی میں مشتاق سے 20ہزار اور موبائل فون، نولکھا میںجمیل سے40ہزار اور موبائل فون لوٹ لیاہے۔ چوروں نے ستوکتلہ میں سے حامد، ملت پارک سے فضل کی گاڑیاں جبکہ سول لائن میں سے شہزاد، کاہنہ میں علی، گلبرگ میں مبین، ستوکتلہ میں نعیم، شادباغ میںسے واجد، ، ڈیفنس سی سے امین کی موٹرسائیکلیں چوری کر لی ہیں۔ علاوہ ازیں فیروز والا سے نامہ نگار کے مطابق جی ٹی روڈ کی آبادی شامکے پولیس چوکی کے قریب ڈاکوؤں نے بیرون ملک پلٹ فیملی کی گاڑی روک کر تین سگے بھائیوں سمیت پانچ افراد کو لوٹ لیا۔ ڈاکو تقریباً پونے دو لاکھ روپے کی رقم، موبائل، زیورات دیگر سامان چھین کر فرار ہو گئے۔ بتایا گیا ہے کہ سیالکوٹ کا رہائشی قدیر احمد اپنے بھائی عدیل احمد، عامر سہیل اور ساتھی کے ہمراہ کیری ڈبے میں سیالکوٹ جا رہے تھے کہ پولیس چوکی کے قریب ڈاکوؤں نے اسے روک کر لوٹ لیا۔ مریدکے میں ڈاکوؤں نے بنک سے رقم لے کر آنے والے شہری موٹرسائیکل سوار بوٹا کو لوٹ لیا۔ ڈاکو دو لاکھ روپے کی رقم چھین کر فرار ہو گئے۔ ڈاکوؤں نے سکول بچوں کو چھوڑنے والے شہری وقاص صدیق کو لوٹ لیا۔ ڈاکو نقدی، موبائل چھین کر لے گئے۔