لاہور(سپورٹس رپورٹر+نمائندہ سپورٹس) پاکستان اور سری لنکا کے درمیان قذافی سٹیڈیم لاہور میں ہونے والے تیسرے ٹی ٹونٹی کے لیے 4 انکلوژرز کے 1500 والے تمام ٹکٹس پہلے ہی روز فروخت ہو گئے۔ پاکستان اور سری لنکا کے درمیان ٹی ٹونٹی سیریز کا تیسرا میچ قذافی سٹیڈیم میں 29 اکتوبر کو کھیلا جائے گا ۔کرکٹ شائقین کو پاکستان اور سری لنکا کے درمیان تیسرے ٹی ٹونٹی کا بے چینی سے انتظار ہے اور میچ دیکھنے کے لئے ٹکٹ حاصل کرنے کی سر توڑ کوششیں بھی کر رہے ہیں۔ میچ کے لیے ٹکٹوں کے حصول کے پہلے مرحلے میں 7 انکلوژرز کے ٹکٹ آن لائن فروخت کے لیے دستیاب تھے۔ جن میں سے عبدالقادر، اے ایچ کاردار، جاوید میانداد اور راجاز انکلوژرز کے ٹکٹوں کی قیمت 1500 روپے مقرر کی گئی تھی جو تمام کے تمام بک ہو چکے ہیں۔ عمران خان اور فضل محمود انکلوژرز کے لئے ٹکٹ کی قیمت 3 ہزار روپے جب کہ وسیم اکرم انکلوژر کے لئے ٹکٹ کی قیمت 5 ہزار روپے مقرر کی گئی ہے۔وسیم اکرم انکلوژر کے 5 ہزار روپے والے وی وی آئی پی ٹکٹس کی بھی مانگ بڑھ گئی ہے۔