لاہور (سپورٹس رپورٹر+نمائندہ سپورٹس)پاکستان کےخلاف ٹی ٹونٹی سیریز کیلئے سری لنکن ٹیم کا اعلان آج متوقع ہے۔سری لنکا کے وزیرِ کھیل دیاسری جیاسکیرانے فاسٹ باﺅلر لاستھ مالنگا کی درخواست مسترد کردی کہ لاہورکے ٹی ٹونٹی میچ کیلئے علیحدہ ٹیم منتخب کی جائے اور کہا کہ پاکستان کے خلاف تینوں ٹی ٹونٹی انٹرنیشنل میچوں کیلئے ایک ہی ٹیم منتخب کی جائےگی۔سری لنکا کے وزیرِ کھیل نے کہا کہ یہ ممکن نہیں اور یہ حق کھلاڑیوں کا نہیں کہ وہ اپنی مرضی کے میچز کا انتخاب کریں کہ کس میں انھیں کھیلنا ہے اور کس میں نہیں۔ یہ بیان دراصل پاکستان کے دورے پر جانے کے سلسلے میں سری لنکن حکومت کی جانب سے باضابطہ توثیق بھی ہے۔ سری لنکن کرکٹ بورڈ پہلے ہی پی سی بی کی جانب سے سکیورٹی کی یقین دہانی پر اپنا مثبت ردعمل ظاہر کرچکا ہے۔ سری لنکا میں کرکٹ سمیت تمام ٹیموں کے سلیکشن کی حتمی منظوری کا اختیار وزارتِ کھیل کے پاس ہے۔
پاکستان کے خلاف ٹی ٹوئنٹی سیریز کے لیے سری لنکن ٹیم کا اعلان آج متوقع ہے۔لاستھ مالنگا کے علاوہ کپتان اپل تھرنگا بھی پاکستان جانے سے انکار کرچکے ہیں لیکن جن کھلاڑیوں نے پہلے پاکستان جانے میں بورڈ کو تحفظات ظاہر کیے تھے متعدد نے رائے تبدیل کردی ہے اور پاکستان جانے کے لیے تیار ہوچکے ہیں۔