لاہور (نامہ نگار) گلبرگ کے علاقہ فردوس مارکیٹ میں تین منزلہ عمارت میں آتشزدگی سے 3 لڑکیاں جھلس کر زخمی ہو گئیں جبکہ لاکھوں روپے مالیت کا سامان جل کر تباہ ہو گیا ہے۔ بتایا جاتا ہے کہ فردوس مارکیٹ میں تین منزلہ فلیٹس کی دوسری منزل پر شارٹ سرکٹ کے باعث آگ بھڑک اٹھی جس نے تیسری منزل کو بھی اپنی لپیٹ میں لے لیا۔ آگ کی زد میں آکر فلیٹ میں رہائش پذیر پرویز ٹھیکیدار کی تین بیٹیاں 20 سالہ کرن، 18 سالہ نشاءاور 16 سالہ ثانیہ زخمی ہو گئیں۔ تینوں لڑکیوں کو طبی امداد کے لئے ہسپتال بھجوا دیا گیا جبکہ ریسکیو نے آگ پر قابو پا لیا ہے۔ لڑکیوں کی حالت خطرے سے باہر بتائی جاتی ہے۔