لاہور‘ فیروزوالا(نامہ نگاران) صوبائی دارالحکومت کے مختلف علاقوں میں ڈاکوئوں اور چوروںنے وارداتوں کے دوران متعدد شہریوں سے لاکھوں مالیت کی نقدی، طلائی زیورات، موبائل فون، گاڑیاں، موٹر سائیکلیں اور دیگر سامان لوٹ لیا ہے۔ ڈاکوؤں نے شالیمارکے علاقہ میں مختار علی کے اہلخانہ کو گن پوائنٹ پر یرغمال بنا کر 8لاکھ مالیت، ستوکتلہ میں شکور کے گھر سے 4لاکھ روپے کی نقدی، طلائی زیورات، موبائل فون اور دیگر سامان، برکی میں احمد علی اور اس کی فیملی سے 4لاکھ مالیت، بادامی باغ میں ادریس اور اس کی فیملی سے 3لاکھ مالیت، نواب ٹائون میں محمود اور اس کی فیملی سے اڑھائی لاکھ مالیت، ٹائون شپ میں عباس کی فیملی سے 2لاکھ مالیت کی نقدی، طلائی زیورات اور موبائل فون، گجر پورہ میں اشفاق سے 2لاکھ 75ہزار اور موبائل فون ، شفیق آباد میںغلام حسین سے ایک لاکھ اور موبائل فون، نشترکالونی میں جاوید سے 50ہزار اور موبائل فون، فیصل ٹائون میں صدیق سے 35ہزار اور موبائل فون، سبزہ زار میں فضل سے 25ہزار اور موبائل فون لوٹ لیا ہے۔ چوروں نے گلشن راوی میں منیر کے گھر سے 5 لاکھ 34ہزار روپے، نشتر کالونی میں راشد کے گھر سے ساڑھے 4 لاکھ روپے، راوی روڈ میں آصف کے دفترسے ڈیڑھ لاکھ مالیت کی نقدی و سامان چوری کرلیا ہے۔ چوروں نے مغلپورہ میں آصف ،گلشن راوی سے منان کی کاریں جبکہ گجر پورہ میں رضا علی،قلعہ گجر سنگھ سے مجیب احمد، شیرا کوٹ میں الطاف، شادمان سے منصور، بادامی باغ سے ماجد، سمن آباد میں احمد وقاص کی موٹرسائیکلیں چوری کر لی ہیں۔ علاوہ ازیں فیروزوالا سے نامہ نگار کے مطابق جی ٹی روڈ کی آبادی رچنا ٹائون میں ڈاکو موبائل کمپنی کے آفس میں گن پوائنٹ پر سکیورٹی سٹاف کو یرغمال بناکر لاکھوں روپے مالیت کی بیٹریاں ٹرک میں لوڈ کرکے فرار ہوگئے۔ عارف علی شاہ کی رپورٹ پر مقدمہ درج کرلیا۔ کوٹ عبدالمالک کے علاقہ چٹھہ کالونی میں ڈاکو مظفر کے گھر میں گھس کر 7لاکھ کے زیورات‘ ہزاروں روپے، گھریلو سامان لوٹ کر لے گئے۔ لاہور شرقپور روڈ کی آبادی لال پلی میں ڈاکوئوں نے دکان کے مالک دائود خان اور گاہکوں کو لوٹ لیا، تقریباًایک لاکھ کی نقدی اور موبائل چھین کر فرار ہوگئے‘ پولیس نے مقدمہ درج کرلیا ہے۔