وفاق کے گرد گہرے بادل منڈلا رہے ،10 دن سے پنڈی ‘اسلام آباد مفلوج ہے: رضا ربانی
کراچی (نیٹ نیوز) چیئرمین سینٹ رضا ربانی نے کہا ہے وفاق کے گرد گہرے بادل منڈلا رہے ہیں اور پچھلے 10دن سے راولپنڈی اور اسلام آباد مفلوج ہیں۔ سابق سینیٹر اقبال حیدر کی پانچویں برسی کے موقع پر سوسائٹی فار سیکولر پاکستان کے تحت ہونے والے میموریل ریفرنس سے خطاب کرتے ہوئے انہوں نے کہا آج ملک میں صورت حال تشویشناک ہے، بلوچستان میں کوئی انسانی حقوق کا علمبردار آواز بلند کرے تو اس کے اہل خانہ اسے ڈھونڈتے پھریں گے، اسلام آباد میں طلبہ نے مظاہرہ کیا تو ان کے کیمپ بھی اکھاڑ دئیے گئے۔ اقبال حیدر اچھے وکیل، سیاست دان اور انسانی حقوق کے علمبردار تھے، انہوں نے تمام عمر ایمانداری سے بااصول سیاست کی اور کبھی اصولوں پر سمجھوتہ نہیں کیا۔ اس موقع پر جسٹس ریٹائر ناصر اسلم زاہد، آئی اے رحمان، ڈاکٹر ہارون احمد، بیگم انیس ہارون اور علیزے اقبال حیدر نے بھی خطاب کیا۔
