لاہور (سپورٹس رپورٹر+نمائندہ سپورٹس) پاکستان کے کراٹے چیمپئن سعدی عباس نے اولمپکس کوالیفائنگ راونڈ کی تیاریوں اوراولمپکس میں شرکت یقینی بنانے کیلئے سہولیات کی فراہمی کا مطالبہ کیا ہے۔سعدی عباس نے کہا ہے کہ اولمپک کوالیفائنگ راونڈ 2018 میں شروع ہو گا جس میں ورلڈ پریمیئر لیگ، ایشین چیمپئن شپ، ایشین گیمز اور ورلڈ چیمپئن شپ کے ایونٹس شامل ہیں، اولمپکس میں کوالیفائی کرنے کیلئے ان ایونٹس میں شرکت کرتے ہوئے رینکنگ بہتر بنانے کی ضرورت ہے، بنیادی ضروریات کیلیے فنڈز دیئے جا رہے ہیں تاہم صرف یہ ہی کافی نہیں، اولمپکس میں شرکت کیلئے بین الاقوامی معیار کی پروفیشنل سہولیات درکار ہیں۔واضح رہے کہ ستمبر میں ورلڈ کراٹے فیڈریشن کے زیر اہتمام استنبول میں منعقدہ ورلڈ کراٹے 1 سیریز میں سعدی عباس نے پانچویں پوزیشن حاصل کی تھی، وہ دو مرتبہ کامن ویلتھ چیمپئن، یو ایس اوپن چیمپئن اور سائوتھ ایشین چیمپئن رہ چکے ہیں۔