کوئٹہ (بیورو رپورٹ) ضلع پشین کے علاقے میں نامعلوم افراد کی ڈی ایس پی کی گاڑی پر فائرنگ، کوئی جانی نقصان نہیں ہوا۔ پولیس ذرائع کے مطابق ایس ڈی پی او پشین جلیل احمد کی گاڑی پر کلی لمڑان میں نامعلوم افراد نے فائرنگ کی تاہم پولیس کی جوابی کارروائی میں حملہ آور فرار ہوگئے پولیس نے حملہ آوروں کی تلاش شروع کردی۔ علاوہ ازیں گزشتہ روز کوئٹہ کے علاقے کلی شیخان سے نامعلوم شخص کی نعش ملی جسے پولیس نے شناخت کیلئے بی ایم سی ہسپتال منتقل کردیا مزید برآں نیب بلوچستان نے ایک اور بدعنوان ٹھیکیدار کو دبوچ لیا۔ نیب بلوچستان نے مائنز اینڈ منرلز ڈیپارٹمنٹ کی جانب سے دیئے گئے ایک ٹھیکے میں غبن کرنے کے جرم میں ٹھیکیدار روزی خان کاکڑ کو گرفتار کرلیا ملزم نے اپنے دیگر ساتھیوں کیساتھ ملکر قومی خزانے کو 66لاکھ 85ہزار روپے سے زائد کا چونا لگایا تھا نیب ملزموں کیخلاف ریفرنس دائرکیا جاچکاہے نیب ذرائع کے مطابق ملزموں کو آج احتساب عدالت میں پیش کرکے انکا ریمانڈ حاصل کیا جائے گا۔