اسلام گڑھ (صباح نیوز) تھانہ تھوتھال میرپور کی پولیس گردی، سادہ کپڑوں میں ملبوس سب انسپکٹر آصف عظیم اور 7پولیس اہلکاران مہاجر کالونی نمبر 3کے 17سالہ نوجوان حماد رشید کو اغوا کرنے کی کوشش کی، علاقہ کے نوجوان عثمان اعظم ودیگر نے نوجوان اغوا ہوتے دیکھ کر شور مچایا جس پر اہلیان محلہ اکٹھے ہو گئے شہریوں کے احتجاج پر تھوتھال پولیس نوجوان حماد رشید مغل کو وہیں چھوڑ کرتھانہ اسلام گڑھ چلی گئی۔ نوجوان حماد رشید مغل کے والد محمد رشید مغل ،بڑے بھائی مغل ودیگر اہل محلہ تھانے پہنچ گئے اور تھوتھال تھانہ کی پولیس گردی کے خلاف بھرپور احتجاج کرتے ہوئے تھوتھال پولیس کے سب انسپکٹر آصف عظیم ودیگر کے خلاف تحریری درخواست بھی جمع کروا دی تاحال مقدمہ درج نہ ہو سکا۔ پولیس ذرائع کے مطابق مہاجر کالونی نمبر 3میں واقعہ نام کی غلط فہمی کی بنیاد پر پیش آیا۔