کاہنہ (نامہ نگار) کاہنہ میں ڈھائی سالہ بچہ جوہڑ میں ڈوب کر جاں بحق ہوگیا۔ واقعہ پر اہل علاقہ نے ضلعی انتظامیہ کیخلاف شدید احتجاج کیا۔ نواحی گائوں کچوانہ کے رہائشی لیاقت کا ڈھائی سالہ بیٹا فیضان کھیلتے ہو ئے گھر سے باہر بنے گندے پانی کے جوہڑ گر گیا۔ بچے کے لاپتہ ہونے پر تلاش شروع کی گئی تو جوہڑ کنارے بچے کی جوتی ملنے پر جب جوہڑ میں تلاش کیا گیا تو نعش مل گئی جس پر علاقے میں کہرام مچ گیا جبکہ ماںباپ پر جیسے سکتہ طاری ہو گیا۔ اہل علاقہ کا کہنا تھا کہ پورے علاقے میں سیوریج سسٹم نا کارہ ہو چکا ہے جس کی وجہ سے پورے علاقے میں جگہ جگہ گندے پانی کے جوہڑ بن چکے ہیں۔ یاد رہے چند ماہ قبل بھی اسی علاقے میں بنے گندے پانی کے جوہڑ میں ایک بچہ ڈوب کر جاں بحق ہو گیا تھا ۔