ملتان (نمائندہ نوائے وقت) پاکستان پیپلزپارٹی کے چیئرمین بلاول بھٹو زرداری نے گزشتہ شب ملتان میں ہی قیام کیا جبکہ سابق صدر آصف علی زرداری بذریعہ خصوصی طیارہ جلسہ ختم ہونے کے بعد ملتان سے واپس روانہ ہو گئے۔ ذرائع کے مطابق بلاول بھٹو زرداری نے گیلانی ہاؤس میں قیام کیا۔ پیپلزپارٹی نے بھی پی ٹی آئی کی طرز پر جلسوں کو کامیاب بنانے اور شرکائے جلسہ کو تفریح فراہم کرنے کیلئے معروف گلوکاروں کی خدمات حاصل کرنا شروع کر دی ہیں اور ساؤنڈ سسٹم بھی ڈی جیز کے حوالے کر دیا ہے۔ گزشتہ روز ملتان میں ہونیوالے جلسہ کیلئے تحریک انصاف کے جلسوں اور دھرنوں سے شہرت پانیوالے ڈی جی بٹ سے ساؤنڈ سسٹم کی خدمات حاصل کیں اسی طرح معروف فوک گلوکار عارف لوہار اور انکی ٹیم کو خصوصی طور پر مدعو کیا گیا۔ گلوکار ساجد ملتانی نے بھی فن کا مظاہرہ کیا۔ مخدوم احمد محمود خود بس چلا کر جلسہ گاہ آئے۔