لاہور (نمائندہ سپورٹس) لاہور پولو کلب کے زیراہتمام بنک آف پنجاب پولو کپ 2017ء کے چوتھے دن آخری لیگ میچ میں زرعی ترقیاتی بنک نے گارڈ گروپ کو 7-1 سے شکست دے کر مین فائنل کیلئے کوالیفائی کرلیا۔آخری لیگ میچ میں فائنل کھیلنے کیلئے زرعی ترقیاتی بنک اور گارڈ گروپ کے درمیان مقابلہ ہوا جو زرعی ترقیاتی بنک نے جیتا۔پہلے چکر میں کوئی گول نہیں ہوا۔ دوسرے چکر میں زرعی بنک کی طرف سے تین گول ہوئے۔ تیسرے چکر میں دونوں طرف سے ایک ایک گول ہوا۔ چوتھے چکر میں زرعی بنک نے تین گول کر کے میچ جیت لیا۔زرعی ترقیاتی بنک کی طرف سے ممتا زعباس نیازی نے تین، ثاقب خان خاکوانی نے دو جبکہ عمران اختر اور راجہ ارسلان نجیب نے ایک ایک گول سکور کیا۔ گارڈ گروپ کی طرف سے تیمور علی ملک نے واحد گول کیا جبکہ آدھا گول انہیں ہینڈی کیپ ایڈوانٹیج حاصل تھا‘ آج فائنل سوا تین بجے ہو گا۔