شانگلہ (نیٹ نیوز) قراقرم ہائی وے پر پتان کے علاقے میں گاڑی کو پیش آنے والے حادثے میں 3 فوجی اہلکار جاں بحق جبکہ 2 شدید زخمی ہو گئے۔ فوجی اہلکار کئی روز بعد چھٹیاں منانے اپنے گھروں کو جا رہے تھے۔ مقامی پولیس نے میڈیا کو بتایا کہ گلگت سے راولپنڈی جانے والی گاڑی پتان کے علاقے میں گہری کھائی میں جاگری جس سے گاڑی میں سوار 3 فوجی اہلکار جاں بحق جبکہ دو زخمی ہوئے۔ پولیس کا کہنا تھا کہ مقامی افراد اور فرنٹیئر ورکس آرگنائزیشن کے اہلکاروں نے ریسکیو آپریشن میں حصہ لیا اور نعشوں اور زخمیوں کو نکال کر ہشام کے تحصیل ہیڈکوارٹرز ہسپتال منتقل کیا۔ ہسپتال میں ڈاکٹروں نے تین جوانوں کو مردہ قرار دیا ۔