لاہور (سپورٹس رپورٹر) پنجاب یونیورسٹی نے 41 ویں ہائر ایجوکیشن کمشن آف پاکستان انٹر یونیورسٹی وومن اتھلیٹکس چیمپئن 265پوائنٹس کے ساتھ جیت کر ٹیم ٹرافی اپنے نام کر لی۔ چیمپئن شپ میں یونیورسٹی آف سرگودھا نے 150پوائنٹس کے ساتھ دوسری جبکہ لاہور کالج فار ویمن یونیورسٹی نے 126پوائنٹس کے ساتھ تیسری پوزیشن حاصل کی۔ پنجاب یونیورسٹی کی صبا یوسف 3گولڈ میڈلز اور ایک سلور میڈل کے ساتھ ایونٹ کی بہترین اتھلیٹ قرار پائی۔ صبا یوسف نے 55پوائنٹس جبکہ یونیورسٹی آف سرگودھا کی بینش منیر نے 52اور لاہور کالج فار ویمن یونیورسٹی کی غزالہ نے 48پوائنٹس حاصل کئے۔ اپنے خطاب میں وائس چانسلر پروفیسر ڈاکٹر ظفر معین ناصر نے کہا کہ ہار اور جیت زندگی کا اہم حصہ ہے۔ انہوں نے کھلاڑیوں کو نصیحت کی کہ وہ اپنے اندر سپورٹس مین سپرٹ کو پیدا کریں کیونکہ یہ انہیں زندگی میں آگے لے کر جائے گی۔