کراچی (سٹاف رپورٹر) پیپلز پارٹی کے چیئرمین بلاول بھٹو زرداری نے کہا ہے کہ میری جدوجہد غریبوں اور پسے ہوئے طبقات کے لئے ہے۔ ایک دن ملک کو شہید محترمہ بے نظیر بھٹو کے خوابوں کی تعبیر دیں گے۔ بے نظیر بھٹو شہید کی 10 ویں برسی پر ان سے عہد وفا دہرائیں گے۔ ان خیالات کا اظہار انہوں نے ضلع شرقی گلستان جوہر کامران چورنگی ذکری گوٹھ اور دیگر شہروں میں اجتماعات سے ہولو گرام ٹیکنالوجی کے ذریعے خطاب میں کیا۔ بلاول بھٹو زرداری نے کہا کہ حملوں کے باجود بی بی نے آمروں کو للکارا۔ انہوں نے کہا کہ محترمہ جمہوریت کو بچانے کے لئے کبھی بھی دہشتگردوںسے خوفزدہ نہیں ہوئیں اور جمہوریت کی حفاظت کرتی رہیں۔شہید رانی کے قاتلوں کو بے نقاب کیا ان کی تلاش جاری ہے۔بی بی نے جو اصول اپنائے وہ میرے اصول ہیں ۔ ہم ان قوتوں کا پیچھا کریں گے جنہوں نے ہم سے شہید بے نظیر بھٹو کو جدا کیا۔27 دسمبر کو شہید محترمہ بے نظیر بھٹو کی دسویں برسی ہے ہم سب ان کو خراج عقیدت پیش کرنے کے لئے گڑھی خدا بخش میں جمع ہوں گے اور ان کو بتائیں گے کہ بی بی تیرا قافلہ رکا نہیں تھما نہیں انہوں نے کہاکہ میری جدوجہد مساوات او رجمہوریت کے لئے ہے۔