احمد یار (صباح نیوز) پاک و ہند کے مشہور اردو و فارسی کے شاعر مرزا غالب کا 220 واں یوم پیدائش آج بدھ کو منایا جائے گا۔ مرزا غالب 27 دسمبر 1797 کو آگرہ میں پیدا ہوئے اور 15 فروری 1869ء کو خالق حقیقی سے جا ملے۔ ان کا پورا نام مرزا اسد اللہ بیگ خان تھا۔ مسلمانوں کی عظیم سلطنت کی بربادی اور زوال پذیر مسلم اشرافیہ انگریزوں کا برصغیر پر مستحکم ہوتا اقتدار یہ ہے غالب کا زمانہ جس کا ان کی فکر اور شاعری پر بہت گہرا اثر پڑا۔ غالب کے فلسفیانہ مزاج‘ جذبات و احساسات نے ان کے لفظوں کی معنویت میں اضافہ کیا۔ 19 ویں صدی کے نامور شاعر مرزا اسد اللہ غالب نے کئی غزلیں لکھیں جنہیں بھارت اور پاکستان کے معروف گلوکاروں نے گایا بھی ہے۔ ان کی سخن وری کے شاہکار ’’دیوان غالب‘‘ کو ابدی حیثیت حاصل ہے۔ مرزا غالب کے 220 ویں یوم پیدائش کے موقع پر مختلف ادبی اور غیر سرکاری تنظیموں کے زیراہتمام مرزا غالب کو خراج عقیدت پیش کرنے کیلئے پروگرامز اورسیمینارز انعقاد پذیر ہونگے۔