ساہیوال (نمائندہ نوائے وقت)غوثیہ کالونی میں مسلح افراد کا پولیس پارٹی پر حملہ‘ پتھرائو وردیاں بھی پھاڑ ڈالیں‘ زیرحراست منشیات فروش بھی چھڑالیا۔ پولیس تھانہ غلہ منڈی کے اے ایس آئی شاہد محمود نے سر کاری گاڑی 9603/SLKمیں 4ملازمین کے ہمراہ چھاپہ مارا منشیات فروش عثمان کو گرفتار کر لیا، اسکے قبضہ سے ڈیڑھ کلو سے زائد چرس بھی بر آمد کر لی ۔ پولیس پارٹی عثمان کو لیکر روانہ ہوئی تو ڈنڈوں سے مسلح عورتوں اور نوجوانوں نے پولیس پارٹی پر حملہ کر دیا ۔ ہنگامہ کر کے پولیس ملازمین کی وردیاں پھاڑ دیں ‘ عورتوں نے منشیات فروش عثمان کو چرس سمیت چھڑا لیا اور پولیس پر پتھرائو جاری رکھا جس پر پولیس نے دوڑیں لگا دیں۔ پولیس کی بھاری نفری مو قع پر پہنچ گئی تو ملزمان فرار ہو گئے۔پتھرا ئو کے سبب سر کاری گاڑی تباہ ہو گئی۔ پولیس غلہ منڈی نے عثمان اور حملہ آوروں محبوب حیات،یعقوب حیات، شفقت رسول، سدرہ، ندا اور مہرین سمیت 7 ملزموں کے خلاف مقدمہ درج کر لیا ۔