لاہور(نوائے وقت رپورٹ) آرمی چیف کی ہدایت پر کور کمانڈر لاہور کی قیادت میں آرمی میڈیکل ٹیم نے چلڈرن ہسپتال لاہور میں دل کے عارضے میں مبتلا لڑکے کی عیادت کی ۔ کور کمانڈر لاہور لیفٹیننٹ جنرل عامر ریاض کی طرف سے احسن حسین کو گلدستہ پیش کیا گیا۔ آرمی چیف جنرل قمر جاوید باجوہ کی جانب سے لڑکے کے پیغام کے صرف دو گھنٹے کے اندر کور کمانڈر لاہور کو لڑکے احسن حسین کا علاج کرانے کی ہدایت کروائی گئی۔ کور کمانڈر لاہور نے احسن حسین کی جلد صحت یابی کیلئے د عا کی۔ پروفیسر مسعود صادق نے بتایا کہ احسن حسین کے دل کے عارضے کا مسئلہ خاندانی ہے ہارٹ ٹرانسپلانٹ سے بچے کو بچایا جاسکتا ہے۔ احسن حسین نے سوشل میڈیا پر ویڈیو پیغام میں آرمی چیف سے علاج کرانے کی درخواست کی تھی۔ نجی ٹی وی کے مطابق بیمار بچے احسن حسین کو سی ایم ایچ منتقل کردیا گیا ہے جہاں اس کا مکمل علاج ہوگا۔