لاہور (سٹاف رپورٹر + خصوصی رپورٹر) پنجاب ایگزمیشن کمشن کے زیراہتمام پنجاب بھر میں ہونیوالے پانچویں اور آٹھویں کے امتحانات کی ڈیٹ شیٹ پر وزیراعلیٰ پنجاب کی تصویر بھی لگا دی گئی۔ شہبازشریف کا نعرہ ’’پڑھو پنجاب بڑھو پنجاب‘‘ کا نعرہ بھی درج ہے۔ ترجمان پنجاب ایگزمینشن کمیشن ملک شہزاد کا کہنا ہے کہ معاملہ کو سیاسی نہ بنایا جائے، کسی طالب علم کو ڈیٹ شیٹ جاری نہیں کی گئی، ڈیٹ شیٹ صرف ویب سائٹ پر لگائی گئی ہے۔ یاد رہے پنجاب بھر میں پانچویں اور آٹھویں کے سالانہ امتحانات 3 فروری سے شروع ہو رہے ہیں۔ پانچویں کے امتحانات 3 فروری اور آٹھویں کے 15 فروری کو ہونگے۔ ادھر وزیراعلیٰ شہبازشریف نے ڈیٹ شیٹ پر انکی تصویر لگانے کے حوالے سے میڈیا پر نشر ہونے والی خبر کا نوٹس لیتے ہوئے سیکرٹری سکولز ایجوکیشن سے رپورٹ طلب کرلی ہے اور واقعہ کی تحقیقات کا حکم دیا ہے۔