میرپور خاص (نوائے وقت رپورٹ) شریک چیئرمین پیپلز پارٹی آصف زرداری نے میرپور خاص میں جلسے سے خطاب کرتے ہوئے کہا ہے کہ باتیں بہت کرنے کو ہیں، دل میں غریبوں کیلئے بہت ارمان ہیں۔ قیامت میں شہید بھٹو اور بے نظیر بھٹو پوچھیں گے غریبوں کیلئے کیا کیا؟ فرعون کی جنگ ہے اور ہم بنا ہتھیاروں کے کھڑے ہیں، میاں صاحب میں تو چاہتا ہوں کہ آپ راز فاش کر دیں پہلے یہ بھی بتائیں کہ آپ کیسے آئے۔ آپ ہم پر الزام نہیں لگا سکتے کہ ہم نے پاور میں آنے کیلئے کسی کا سہارا لیا۔ بات اپنے گریبان سے شروع ہونی چاہئے۔ ہم تو ہمیشہ لہروں کیخلاف تیر کر آئے۔ ہمارے پاس عوام کی طاقت آپ کے پاس دولت کی طاقت ہے۔ میں 40 سال سے زمینداری کر رہا ہوں ہم غریبوں کے پیار پر خوش ہیں آپ دھن کی طاقت پر خوش ہوں۔ میرے کندھے پر ذوالفقار علی بھٹو اور بے نظیر کا ویژن ہے۔ ہمارے ہاتھ میں جھنڈا اور تیرکا نشان ہے یہ دھرتی میرے لئے نئی نہیں، میں 40 سال سے بیٹھا ہوں میں ہاریوں کے ساتھ ہوں وڈیروں کے نہیں، میں ہر وہ کام کروں گا جس میں ہاری اور مزدوروں کا فائدہ ہو۔ میاں صاحب آپ اپنے گیربان میں جھانکیں ہم پر الزام نہ لگائیں۔ ہم نے پاور میں آنے کیلئے کسی کا سہارا نہیں لیا۔ آپ نے ہمیشہ ہیوی مینڈیٹ کہاں سے لیا، ہم کسی غریب کا حق نہیں کھانا چاہتے۔