لاہور (ا ین این آئی) صوبائی دارالحکومت کے اندرون موچی گیٹ میں تین منزلہ بوسیدہ عمارت گرنے سے ملبے تلے دب کر میاں بیوی 2 بچوں سمیت جاں بحق ہوگئے جبکہ سات سالہ بچے کو زندہ نکال لیا گیا، واقعہ میں 6راہگیر بھی زخمی ہوئے۔ ریسکیو ذرائع کے مطابق ہفتہ کے روز اندرون شہر کے علاقے میں واقع 3 منزلہ عمارت زوردار دھماکے سے زمین بوس ہوگئی جس سے فضاء میں گردو غبار کے بادل چھا گئے۔ حادثے کے فوری بعد اہل علاقہ اور ریسکیو ٹیمیں موقع پر پہنچ گئیں اور امدادی کاموں کا آغاز کردیا گیا۔ ریسکیو ٹیموں نے عمارت کے ملبے سے دو بچوں کی نعشیں نکال لیں، جن کی شناخت 15سالہ علی گوہر اور 12سالہ زید حیدر کے نام سے ہوئی ۔ دوسری جانب ملبے تلے دبے ایک سات سالہ بچے کو زندہ نکال کر طبی امداد کے لئے ہسپتال منتقل کر دیا۔ ریسکیو ٹیموں نے کئی گھنٹوں کے آپریشن کے بعد ملبے تلے دبے میاں بیوی کو بھی نکال لیا تاہم وہ جاں بحق ہو چکے تھے ۔ غلام عباس اور مریم بی بی سمیت چاروں جاں بحق ہونیوالے افراد کی نعشیں ہسپتال منتقل کر دی گئیں۔ ریسکیو آپریشن 7گھنٹے سے بھی زائد وقت تک جاری رہا ۔ ریسکیو حکام نے ملحقہ مکانوں کو بھی خطرناک قرار دیتے ہوئے خالی کروا لیا ۔