کراچی (نوائے وقت رپورٹر) چیف جسٹس ثاقب نثار نے چھٹی کے روز عوامی مفاد کے 3 مقدمات کی سماعت کے موقع پر عدالت کے باہر احتجاج کرنے والے بزرگ میاں بیوی کو بلا لیا۔ بزرگ شہری پلے کارڈ اٹھائے عدالت کے باہر کھڑے تھے۔ میاں بیوی کا تعلق گلستان جوہر کراچی سے ہے۔ بزرگ شہری ہاشم خان نے کہا کہ ہمارے 2 بیٹے 14 سال سے جیل میں ہیں۔ شاہد اور زاہد خان کو سزا ہوئی ہماری اپیل نہیں سنی جا رہی۔ چیف جسٹس نے فیصل صدیقی ایڈووکیٹ کو کیس سمجھنے کی ہدایت کی۔ فیصل صدیقی نے عدالت کو بتایا کہ دونوں کو اغوا برائے تاوان میں سزا ہوئی تھی۔