لاہور (خبر نگار) وزیراعلیٰ پنجاب محمد شہباز شریف نے گذشتہ روز نماز فجر کی ادائیگی کے بعد لاہور اورنج لائن میٹرو ٹرین کے منصوبے کا دورہ کیا۔ وزیراعلیٰ نے چوبرجی میں منصوبے کے تعمیراتی کاموں کا جائزہ لیا اور چوبرجی کے قریب انڈر گرائونڈ حصے میں گئے اور وہاں پر بھی جاری کام کا جائزہ لیا۔ بعدازاں وزیراعلی نے سپریم کورٹ رجسٹری اور جی پی او چوک پر پراجیکٹ کے کاموں پر ہونے والی پیشرفت کا جائزہ لیا۔ وزیراعلی نے ہدایت کی کہ جی پی او چوک کی بندش کے دوران ٹریفک کے بہترین متبادل انتظامات کئے جائیں تاکہ شہریوں کو کم سے کم مشکل کا سامنا کرنا پڑے ۔ وزیراعلی نے لکشمی چوک اور شالامار باغ کے قریب بھی منصوبے کے تعمیراتی کاموں کا معائنہ کیا۔ صبح سویرے وزیراعلیٰ کو دیکھ کر لوگوں نے خوشگوار حیرت کا ا ظہار کیا اور شہبازشریف زندہ بادکے نعرے لگائے۔ شہریوں نے وزیراعلیٰ سے کہا آپ انتہائی محنت سے کام کررہے ہیں ۔ اللہ تعالی خیر کرے گا۔ بعض لوگ آپ کے کام سے جلتے ہیں۔