لاہور(سپورٹس رپورٹر+نمائندہ سپورٹس) انڈر 19کرکٹ ورلڈ کپ میں پاکستان نے آئرلینڈ کو 9 وکٹوں سے ہراتے ہوئے پہلی فتح حاصل کر لی۔ پاکستان نے ٹاس جیت کر آئر لینڈ کو بیٹنگ کی دعوت دی، آئرلینڈ کی ٹیم بڑا مجموعہ تشکیل دینے میں ناکام رہی اور پوری ٹیم 97 رنز پر پویلین لوٹ گئی، لیف آرم پیسر شاہین شاہ آفریدی نے صرف 15رنزکے عوض 6 کھلاڑیوں کو پویلین بھیجا، کپتان حسن خان نے 16 رنز دے کر 3 وکٹیں حاصل کیں۔گرین شرٹس نے 8.5 اوورز میں ایک وکٹ کے نقصان پر باآسانی ہدف عبور کر لیا، اوپنر محمد زید عالم 19 گیندوں پر 7 چوکوں اور ایک چھکے کی مدد سے 43 رنز بنا کر ناقابل شکست رہے، کپتان حسان خان 27 رنز پر ناٹ آوٹ رہے، روحیل نذیر 18 رنز بناکرچلتے بنے‘ واحد وکٹ ایرون کاولے نے حاصل کی۔ شاہین آفریدی شاندار کارکردگی پر مین آف دی میچ قرار پائے۔ گرین شرٹس 19 جنوری کو سری لنکا کے خلاف میدان میں اتریں گے۔بھارت نے پاپوا نیو گنی کی ٹیم کو دس وکٹوں سے ہر ادیا ۔پاپوا نیو گنی کی جونیئر ٹیم صرف 64رنز بناکر آئوٹ ہو گئی ۔ بھارت نے ہدف بغیر کسی نقصان کے پورا کرلیا ۔