بنوں(صباح نیوز)بنوں میں سرچ آپریشن کے دوران سیکیورٹی فورسز اور دہشت گردوں کے درمیان فائرنگ کا تبادلہ ہوا جس کے نتیجے میں کیپٹن سمیت دو اہلکار زخمی ہوگئے ۔ سیکیورٹی فورسز کے مطابق بدھ کو بنوں میں جانی خیل کے علاقے زندی علی خیل میں فائرنگ کے نتیجے میں کیپٹن سمیت دو اہلکار زخمی ہوگئے۔زخمیوں کو قریبی اسپتال منتقل کردیا گیا ۔ سیکیورٹی فورسز نے علاقے کو گھیرے میں لیکر سرچ آپریشن شروع کردیا اور دو دہشت گردوں کو گرفتار کرلیا۔ دوسری جانب چمن میں ڈسٹرکٹ پریس کلب کے قریب تین دھماکے ہوئے جس کے نتیجے میں ایک ایف سی اہلکار زخمی ہوگیا۔چمن میں دہشتگردوں کی جانب سے ایف سی کی گاڑی کو ریموٹ کنٹرول ڈیوائس کے ذریعے نشانہ بنایا گیا ۔دھماکے نتیجے میں گاڑی کا نقصان پہنچا اور ایک ایف سی اہلکار زخمی ہوگیا جس کو ہسپتال منتقل کیا گیا، مال روڈ پر عین اس وقت دھماکہ ہوا جب سیکیورٹی فورسز کی گاڑی معمول کے مطابق گشت کررہی تھی۔ دھماکے کے نتیجے میں کوئی جانی نقصان تو نہیں ہوا تاہم فورسز کی گاڑی کو جزوی نقصان پہنچا۔ فورسز نے علاقے میں سرچ آپریشن شروع کر دیا ہے۔