لاہور(سپورٹس رپورٹر+نمائندہ سپورٹس) نیوزی لینڈ کے خلاف چوتھے ایک روزہ انٹرنیشنل میچ میں سر کی چوٹ کا شکار ہونے والے سابق کپتان شعیب ملک کی جگہ عمر امین کو ون ڈے سکواڈ کا حصہ بنا دیا گیا ہے۔ اس بات کا اعلان پاکستان کرکٹ بورڈ کی جانب سے گزشتہ روز اس وقت کیا گیا جب ٹیم کے فزیوتھراپسٹ ویب سنگھ کی جانب سے انہیں پانچویں اور آخری ون ڈے کے لیے مکمل فٹ نہ قرار دیا گیا۔ ہیڈ کوچ مکی آرتھر، کپتان سرفراز احمد نے چیف سلیکٹر انضمام الحق سے مشاورت کے بعد نیوزی لینڈ میں موجود ٹی ٹونٹی سکواڈ کے کھلاڑی عمر امین کو شعیب ملک کے متبادل کے طور پر ون ڈے سکواڈ کا حصہ بنا لیا گیا ہے۔ واضح رہے کہ ڈاکٹرز کی جانب سے شعیب ملک کو ایک ہفتے آرام کا مشورہ دیا گیا جس کی بنا پر سابق کپتان ٹی ٹونٹی سیریز میں بھی قومی ٹیم کی نمائندگی نہیں کر سکیں گے۔