گوجرانوالہ (نمائندہ خصوصی) مدرسہ سے تیرہ سالہ طالبعلم پراسرار طور پر لاپتہ ہوگیا جبکہ بچے کے ورثاء نے پریس کلب کے باہر احتجاج کیا۔ بتایا گیا ہے کہ قلعہ دیدار سنگھ کے محنت کش منظور کا تیرہ سالہ بیٹا سجاد رتہ روڈ پر واقع دینی مدرسہ میں زیر تعلیم تھا جو 13جنوری کو وہاں سے مبینہ طورپر پر لاپتہ ہو گیا۔ ورثا نے تھانہ سیٹلائٹ ٹائون میں سجاد کے لاپتہ ہونے سے متعلق درخواست دی مگر مقامی چیئرمین کی مبینہ ملی بھگت سے پولیس کسی بھی قسم کی کارروائی سے گریزاں ہے۔ کئی روز گزرنے کے بعد بھی تاحال بچے کا کچھ پتہ نہیں چل سکا ہے، ورثا ء نے اعلیٰ حکام سے اپیل کی کہ انکے بچے کو بازیاب کروایا جائے۔ دوسری طرف ایس ایچ او محسن جٹھول کا کہنا تھا کہ ایف آئی آر درج کر کے بچے کی تلاش کی جارہی ہے۔ علاوہ ازیں شہریوں نے مبینہ طور پر 12 سالہ بچی کو اغواء کی کوشش کرنیوالے ملزم کو قابو کرکے پولیس کے حوالے کر دیا جبکہ پولیس نے مقدمہ درج کرکے تحقیقات شروع کر دی۔ گل روڈ پر 12 سالہ ع عیشاء تعلیم حاصل کرکے گھر واپس جا رہی تھی کہ راستے میں فیصل نامی مبینہ ملزم نے بچی کو اغواء کرنے کیلئے ورغلانے کی کوشش کی۔ بچی کے شور مچانے پر شہریوں نے ملزم کو قابو کرکے تھانہ سول لائن پولیس کو آگاہ کر دیا۔ پولیس نے ملزم کے خلاف مقدمہ درج کرکے تفتیش کی جا رہی ہے۔