لاہور ( سپورٹس رپورٹر+نمائندہ سپورٹس )نیشنل ہاکی سٹیڈیم کی تزئین و آرائش مکمل، ورلڈ الیون ٹیم آج لاہور پہنچے گی۔ملک میں انٹرنیشنل ہاکی کی بحالی کیلئے ورلڈ الیون ہاکی ٹیم آج دن ساڑھے بارہ بجے لاہور پہنچے گی۔ پاکستان اور ورلڈ الیون کے مابین دو میچز کی سیریز کا دوسرا اور آخری میچ اتوار کو نیشنل ہاکی سٹیڈیم میں کھیلا جائیگا۔ مہمان ٹیم آج ہفتے کی رات پی ایچ ایف کی جانب سے عشائیہ میں بھی شرکت کریگی۔ ادھر نیشنل ہاکی سٹیڈیم کی تزئین و آرائش مکمل کرلی گئی ہے۔ سٹیڈیم میں آنے کیلئے شائقین کے پاس ٹکٹ اور دعوت نامہ ہونا لازمی ہوگا۔