لاہور (سپورٹس رپورٹر) پاکستان فیڈریشن بیس بال کے صدر سید خاور شاہ جو قضائے الٰہی سے وفات پاگئے تھے ان کے ایصالِ ثواب کیلئے بحریہ ٹاؤن کرکٹ سٹیڈیم میں قرآن خوانی کا اہتمام کیا گیا ‘ پاکستان اولمپک ایسوسی ایشن کے صدر لیفٹیننٹ جنرل سید عارف حسن ، محمد خالد محمود ، چودھری کبیر احمد خان، وفاقی وزیر ریاض حسین پیرزادہ ، ڈاکٹر اختر نواز گنجیرا ، شوکت جاوید ، محمد محسن خان ، شیخ مظہر احمد، چودھری یعقوب ،ادریس حیدر خواجہ اور عثمان انور نے دکھ کا اظہار کرتے ہوئے مرحوم کے صاحبزادے سید فخر علی شاہ اور بھائی سید منظر شاہ سے تعزیت کی۔ اور دعا کی کہ اللہ پاک مرحوم کی مغفرت فرمائیں اور انہیں جنت الفردوس میں اعلیٰ مقام نصیب فرمائیں۔ وفاقی وزیر میاں ریاض حسین پیرزادہ نے اس موقع پر اپنے خیالات کا اظہارکرتے ہوئے کہا کہ سید خاورشاہ نے پاکستان میں کھیلوں اور کھلاڑیوں کے فروغ کے لئے زندگی وقف کررکھی تھی۔ پاکستان کی کھیلوں کی تاریخ میں سید خاورشاہ کانام ہمیشہ سنہرے حروف سے لکھا اور یاد رکھا جائے گا۔