لاہور(نوائے وقت رپورٹ) سابق صدر آصف علی زرداری نے کہا ہے کہ شریف خاندان کا احتساب ابھی شروع نہیں ہوا، شریفوں کی نوٹس پر ہی چیخیں نکل گئیں ان کی کرپشن کا عالمی نیٹ ورک بے نقاب ہونے والا ہے۔ کئی دہائیوں تک احتساب کے نام پر ان کا انتقام برداشت کیا ان کا ابھی تک ناخن بھی نہیں کھینچا گیا۔ انہیں ابھی تک ہتھکڑی نہیں لگی، شریف خاندان کی کرپشن پاکستان تک محدود نہیں بین البراعظمی ہے ان کی کرپشن کا جال امریکہ‘ مشرق وسطیٰ‘ لاطینی امریکہ اور یورپ تک پھیلا ہوا ہے ہم نے نیب کو بھی بھگتا اور نوازشریف کے احتساب الرحمن کا بھی مقابلہ کیا، قبل ازیں آصف زرداری کی زیر صدارت بلاول ہائوس لاہور میں پیپلزپارٹی کا مشاورتی اجلاس ہوا جس میں نیئر بخاری‘ راجہ پرویز اشرف‘ قمر زمان کائرہ‘ چودھری منظور و دیگر نے شرکت کی۔ اجلاس میں 3 فروری کو موچی گیٹ جلسے سے متعلق تبادلہ خیال کیا۔ آصف زرداری نے صوبائی تنظیم کو جلسے کی تیاریوں کیلئے کمیٹیاں تشکیل دینے کی ہدایت کی۔