لاہور ( سپورٹس رپورٹر )ایشین گیمز کوالیفائنگ راؤنڈ میں پاکستان ویمن ہاکی ٹیم کی ناقص کارکردگی پر ہیڈ کوچ سعید خان نے مستعفی ہونے کا فیصلہ کر لیا۔ہاکی ٹیم بنکاک میں ہونیوالے ایشین گیمز کوالیفائنگ راؤنڈ میں ناقص کارکردگی کی وجہ سے تنقید کی زد میں ہے۔ پی ایچ ایف ذرائع کے مطابق سعید خان نے اپنے فیصلے سے بنکاک میں موجود ٹیم مینجمنٹ کے دیگر ساتھیوں کو آگاہ کردیا ہے۔ ایشین گیمز کوالیفائنگ راؤنڈ میں پاکستان ٹیم چھ میں سے ایک میچ جیت سکی۔ سعید خان کے مستعفی ہونے کی وجہ ٹیم کی ناقص کارکردگی اور دو کھلاڑیوں کے الزامات بھی ہیں جس کی انکوائری میں پی ایچ ایف نے سعید خان کو کلیئر کرتے ہوئے کھلاڑیوں پر پابندی عائد کر دی تھی۔