کراچی (کرائم رپورٹر+کرائم رپورٹ) کراچی کے مختلف علاقوں میں فائرنگ و دیگر واقعات میں 4افراد جاں بحق ہوگئے۔ تفصیل کے مطابق فریئر کے علاقے کینٹ ریلوے اسٹیشن کے نزدیک واقع ہوٹل میں دو افراد پراسرار طور پر جاں بحق ہوگئے۔ دونوں کی نعشیں برہنہ حالت میں ہوٹل کے کمرے سے ملیں۔ جس کے بعد پولیس نے لاشوں کو پوسٹ مارٹم کے لئے جناح ہسپتال پہنچایا۔ مرنے والے دونوں افراد کی شناخت شاہنواز ولد رشید اور فیضان ولد مشتاق کے نام سے ہوئی جن کی عمر بالترتیب 35 سال اور23 سال تھی پولیس کے مطابق35 سالہ شاہنواز اندرون سندھ میرپور خاص جبکہ 23 سالہ فیضان کراچی کے علاقے لیاقت آباد کا رہنے والا تھا۔ دریں اثناء مواچھ گوٹھ میں نامعلوم افراد نے ایک نوجوان کو فائرنگ کرکے قتل کر دیا۔ مقتول کی نعش بانٹوا قبرستان کے قریب سے ملی جس کے بعد پولیس نے نعش کو پوسٹ مارٹم کیلئے ہسپتال پہنچایا۔ پولیس کے مطابق مقتول کی شناخت28 سالہ عنایت اللہ کے نام سے ہوئی ہے ۔ ادھر سہراب گوٹھ میں بس اڈے کے قریب ایک شخص پراسرار طور پر جاں بحق ہوگیا۔ متوفی کی شناخت مشتاق کے نام سے ہوئی جس کی عمر تقریباً55 سال تھی پولیس کا کہنا ہے کہ بظاہر متوفی کی موت طبعی معلوم ہوتی ہے تاہم اس کی نعش کو پوسٹ مارٹم کے لئے عباسی شہید ہسپتال پہنچا دیا گیا ۔