لاہور (سٹاف رپورٹر) اولڈ راوینز الیون اور وائس چانسلر الیون کے مابین فیسٹیول کرکٹ میچ کھیلا گیا ‘ اولڈ راوئینز الیون نے سابق ٹیسٹ کرکٹرسلیم ملک کی زیر کپتانی وائس چانسلر الیون کو24 رنز سے شکست دی۔ چیئرمین پی سی بی نجم سیٹھی مہمانِ خصوصی تھے جبکہ جی سی یو وائس چانسلر پروفیسر ڈاکٹر حسن امیر شاہ,اولڈ راوئینز یونین کے صدر قاضی آفاق حسین بھی موجود تھے اولڈ راوئینز نے 156 رنز کا ہدف دیا‘وائس چانسلر الیون132رنز پر ڈھیر ہوگئی سابق کرکٹر عبدالقادر اور ہارون الرشید نے بھی شرکت کی ۔ نجم سیٹھی کا کہنا تھا کہ انہوں نے اپنے زمانہ طالبعلمی میں جم خانہ اور جی سی یونیورسٹی میں بہت سی کرکٹ کھیلی،آج اپنی مادرِ علمی میں آکر جوانی کی تمام یادیں تازہ ہو گئیں ۔ا اس دور میں کرکٹ میں پیسہ بالکل نہیں تھا لیکن کھلاڑیوں میں محنت اورلگن بہت زیادہ تھی۔اس دور میں کھیلنے والے بہت سے دوست بعدازاں قومی کرکٹ ٹیم کا حصہ بنے۔انہوں نے اس موقع پر جی سی یونیورسٹی کی ٹیم کی ترقی اور سہولیات فراہم کرنے کے لیئے مکمل تعاون کی یقین دہانی کرائی۔