لاہور ( کلچرل رپورٹر) لالی ووڈ کی ماڈل و اداکارہ مہوش حیات کو سابق وزیر اعظم بینظیر بھٹو شہید کی زندگی پر بننے والی فلم میں مرکزی کردار میں سائن کر لیا گیا ہے۔ ذرائع کا کہنا ہے کہ فلم کے ہدایت کار کو اس کردار کیلئے سابق وزیر اعظم سے مشابہہ کسی اداکارہ کی تلاش تھی اور قرعہ فال مہوش حیات کے نام نکلا۔ انہوں نے فلم میں پنجاب نہیں جائوں گی میں مہوش حیات کی دبنگ اداکاری دیکھ کر اس بات کا فیصلہ کیا کہ وہ بینظیر بھٹو شہید کی زندگی پر بننے والی فلم کے مرکزی کردار کیلئے مہوش حیات کا ہی انتخاب کریں گے۔ اداکارہ مہوش حیات کا کہنا ہے کہ بینظیر بھٹو شہید حقیقی معنوں میں پاکستانی خواتین کی ترجمان اور عزم و حوصلے کا مجموعہ تھیں ، ان کی زندگی پر بننے والی فلم کے مرکزی کردار میں میرا انتخاب میرے لئے اعزاز کی بات ہے۔ مجھے بہت خوشی ہوگی کہ میں اپنی اداکاری کے ذریعے ان کی شخصیت کے مختلف پہلوئوں کو عوام کے سامنے لائوں۔